Рома синоќа одигра одличен натпревар на гости кај Јувентус, но за Рим се упати поразена откако не реализираше куп шанси, ниту пак пенал.
„Можам само да кажам дека видов една одлична Рома. Тоа им го кажав на моите играчи во соблекувалната“, почна Жозе Мурињо, кој сезонава седи на клупата на „Џалоросите“
Неделното дерби во Калчото беше одлучено во 16. минута кога Моис Кин постигна повеќе случаен гол откако ударот на Родриго Бентанкур го погоди во главата и заврши во мрежата, гол кој потоа се покажа решавачки.
Рома доби удар од белата точка на минута пред паузата, но Жордан Верету само му ја додаде топката на Војчех Шченсни, пропуштајќи колосална шанса за израмнување.
„Нормално, зборуваме за пораз и нула поени, но сѐ што можам да кажам е дека ова беше една одлична Рома во секоја смисла. Честитки за организацијата, за напорната работа, за оние кои играа и покрај некои физички препреки. Видов храброст, самодоверба, верба. Нормално, поразот секогаш е пораз, но доколку го погледнете проектот, тоа значи да се погледне растот на тимот“.
„Можеби јас го гледам различно од вас, но видов тим кој заслужи да победи, а заврши поразен. Таков е фудбалот“, додаде.
„Пред многу години победив тука без добра игра. Сега загубивме играјќи добро и покажувајќи дека сме на вистинскиот пат“.
„Топката ја вртевме внатрешно, но кога бевме кај нив, кај екипа која се брани одлично со тие двајца професори (се мисли на Кјелини и Бонучи, заб. на прев.), не е лесно. И натаму чувствувам дека направивме повеќе од доволно за да победиме или да извадиме најмалку нерешено. Им честитам на моите играчи, но резултатот... Ќе опцуев за малку! Но, им честитам“, заврши Мурињо во негов стил.