Тотенхем синоќа извојува тешко заработена победа на гостувањето кај Барнли, а стратегот Жозе Мурињо има само пофалби за своите играчи.
Особен впечаток му оставил Хари Кејн кој аситираше за погодокот на Сон-мин Хјон во 76. минута кој, пак, беше единствен на натпреварот. Неговата борбеност и желбата да помогне и во одбраната за да се задржи водството е она што го импресионира Португалецот.
„И во последната минута тој играше пресинг, правеше клизачи и ги попречуваше противничките играчи да ја внесат топката во шестнаесетникот. Кога сакате да победите правите сѐ за својот тим, нема место за индувидуалци, нема место за примадони“, вели Мурињо.
Пред победничкиот гол Кејн спаси чист гол за домаќините кога од гол-линијата ја исфрли топката по ударот на Џејмс Тарковски.
„Дури и играч од светска класа како Хари го има тој дух, едноставно сакам да кажам дека е неверојатен“.
„Не сакам да ме сфатите дека тој е најдобар откако сум јас тука. Тој беше неверојатен под секој тренер, беше одличен и под Маурисио Почетино“.
Со вчерашната победа Тотенхем влезе во серија од 10 натпревари без пораз во сите натпреварувања. Кејн во Премиер лигата сезонава има 5 голови и 8 асистенции.
