Фенербахче го доби дербито од 11. коло од турскиот шампионат на гости кај Трабзонспор со 3:2 со голот на Софијан Амрабат во 12. минута од судиското надополнување.
Тренерот на победничкиот тим Жозе Мурињо бурно ја прослави победата во мечот со бројни пресврти, пет гола, 19 корнери и дури 34 удари кон противничкиот гол. После тоа критикуваше некои работи во турскиот фудбал.
Да потсетиме, гостите поведоа во 42. минута со голот на Фред, но Трабзонспор на почетокот на вториот дел го сврте резултатот со головите на Симон Банца од пенал (59. 67.). Един Џеко израмни во 75. минута, а победата на гостите им ја донесе Софјан Амрабат во 12. минута од судиското надополнување.
„Главниот човек на натпреварот беше Атила Караоглан (ВАР судија) - Невидливиот човек. Главниот судија е само дете. Атила Караоглан е човекот на натпреварот. Не сакаме веќе да го видиме на наш натпревар. Не го сакаме за ВАР судија. Ми кажаа многу работи пред да дојдам овде. Не верував, но сега гледам дека е уште полошо отколку што ми кажуваа“, изјави Мурињо по натпреварот и додаде:
„Играме против системот. Зборувам за сите навивачи на Фенербахче кога го кажувам ова. Затоа ја славевме победата вака. Пред да дојдам овде ми кажаа половина од приказната. Да ми ја кажаа целата приказна, немаше да дојдам“.
На неговите критики денеска се надоврзаа и светските медиуми. Видеото од прес-конференцијата по натпреварот открива што навистина мисли за турскиот шампионат.
„Не гледав турски фудбал пред да пристигнам, затоа што никој не сака да го гледа. Кој надвор од Турција сака да го гледа тоа? Тука е Премиер лигата, француската лига, германската лига, португалската лига, холандската лига. Зошто некој би го гледал ова?" рече тој и додаде:
„Почнав да гледам кога бев поканет во Турција. но не можев да поверувам. Премногу мрачно. Смрди.“
Мурињо на својот профил на Instagram го објави и моментот на крајот од натпреварот кога не беше свирнат пенал за неговиот тим. Тој го нарече најголемиот скандал на натпреварот и објасни зошто го објавил.
„Како што кажав, многу луѓе во странство не ја следат турската лига. Мислам дека мојот син е единствениот што ја гледа во Лондон. Никој друг. Затоа објавив видео на Instagram, кое има, мислам, повеќе од пет милиони следбеници, па секој може да види каква е турската лига“, заклучи тој.
