МВР поднесе прекршочна пријава на поранешниот градоначалник на општина Аеродром, Ивица Коневски, откако бил запрен од сообраќајната полиција бидејќи на предниот дел од неговиот автомобил БМВ имал поставено флешери.
Полицијата вчера при направената контрола ги отстранила флешерите од возилото, а против Коневски е поднесена пријава.
Kористењето уреди за давање посебни светлосни и звучни знаци смеат да се вградуваат и употребуваат само на возилата со кои полицијата или воената полиција вршат придружба, вакви уреди може да се вградуваат и употребуваат и на возила определени со акт на Владата, како и на возилата со право на првенство на минување.
Овие уреди може да се вградат и во службените возила што ги користат претставници на Јавното обвинителство заради вршење увид, за обележаните службени возила на припадниците на Управата за финансиска полиција и со закон овластени лица на Царинската управа кои работат на откривање кривични дела и возилата на Министерството за правда со кои се превезуваат лица обвинети или осудени за извршени кривични дела, информираа од МВР минатата недела.