Полицијата достави нови докази до битолското обвинителство за случајот „Транспортер 2“ во кој како осомничен се јавува градоначалникот на Битола, Владимир Талески.
„По барање на битолското обвинителство, полицијата во врска со предметот со кодно име ‘Транспортер 2’, кој се однесува на распишан тендер за избор на најповолен понудувач за превоз на ученици во учебната 2015/2016 година, поднесе посебен извештај против лицата С.П.(54), С.Д.(58), В.П.(48), П.П.(51), С.Б.(58) и В.Т.(58), сите од Битола, вработени во Општина Битола, поради постоење основи на сомнение за сторени две кривични дела – несовесно работење во службата и злоупотреба на службената положба и овластувањето“, велат од МВР.
Отттаму наведуваат дека С.П., С.Д., В.П. и П.П. во својство на членови на Комисијата за јавни набавки постапиле спротивно на Законот за јавните набавки на тој начин што не ја поништиле постапката за избор на најповолен понудувач, иако во тендерската постапка констатирале дека понудените цени за превоз на ученици се многу повисоки од реалните цени на пазарот.
На пример: за една од линиите посочени во тендерот во учебната 2013/2014 година цената за превоз од ученик на ден била 1.000 денари, во учебната 2015/2016 била 3.168 денари од ученик на ден, а во учебната 2016/2017 формирана била цена од 440 денари од ученик на ден, со што на две правни лица, превозници од Битола, им било овозможено да стекнат поголема материјална корист.
С.Б., секретар на Општина Битола, иако немал ингеренции врз работата на Комисијата за јавни набавки, потпишал согласност за склучување договори со нереални пазарни цени.
Градоначалникот, пак, донел одлука за најповолни понудувачи по тендерот за превоз на ученици во учебната 2015/2016 година, по што потпишал штетни договори со две правни лица – превозници од Битола.
Со преземените дејства пријавените на Општина Битола ѝ причиниле материјална штета од 4.321.388 денари.
