Министерството за здравство излезе со демант на „дезинформациите изнесени на прес-конференција на политичката партија ВМРО-ДПМНЕ“, во врска со бројот на заболени од COVID-19 во земјава.
Министерството ги демантира дезинформациите поврзани со наводно прикривање на 20-тина случаи на заболени од COVID-19 од страна на министерот за здравство, доц. д-р Венко Филипче. Во врска со изнесените невистини, Mинистерството за здравство го истакнува следново:
„Согласно податоците од Институтот за јавно здравје, на ден 02.06.2020 година е регистриран 1 позитивен случај на коронавирус во градот Штип.
Во прилог испраќаме линк за точно информирање на јавноста од дневната статистика за 02.06.2020 година што ја води Институтот за јавно здравје: https://www.iph.mk/sostojba-so-covid19-za-162020/.
Исто така, не е точна ни информацијата дека директорот на Клиничката болница во Штип, д-р Ален Ѓеорѓиев изјавил дека се регистирирани 14 нови случаи.
Бројката на хоспитализирани пациенти во болницата на 02.06 е 14, а тоа е точно наведено во дневното соопштение на Министерството за здравство испратено до медиумите и објавено на следниот линк: http://zdravstvo.gov.mk/deneska-se-potvrdeni-76-novi-sluch…/
Министерот Филипче, од првиот дијагностициран случај на COVID-19 во земјава известува точно, навремено и транспарентно. Поради тоа, не се точни обвинувањата од страна на ВМРО-ДПМНЕ во однос на статистиката со новозаразени.“
Понатаму во демантот стои:
„Имено, на 02.06.2020 година, министерот Филипче на прес-конференција потенцираше дека сѐ до почеток на прес-конференцијата сѐ уште не се стигнати бројките од една приватна лабораторија. Подолу транскрипт од неговата изјава на прес конференцијата на споменатиот датум:
Во однос на дневната статистика, сѐ до почеток на прес-конференцијата сѐ уште не беа стигнати бројките од една приватна лабораторија. Во однос на тоа, дозволете да кажам дека би било добро сите да ги чекаме официјалните бројки и да нема шпекулации.
По добивањето на бројките од приватната лабораторија, Министерството за здравство во 18:41 часот преку соопштение информираше за деталната анализа која ја најави и министерот Филипче на прес-конференцијата.
Во врска со Велес, вчера, Министерството за здравство во соопштението за дневна статистика испратено до медиумите информираше дека по завршување на епидемиолошките анкети, 2 лица од претходниот ден регистрирани во Скопје се од Велес. Во прилог линк до соопштението: http://zdravstvo.gov.mk/deneska-se-potvrdeni-120-novi-sluc…/
Потенцираме дека во ниту еден случај министерот Филипче и Министерството за здравство не се обиделе да прикријат податоци и уште еднаш потсетуваме дека од првиот регистриран случај па досега, министерот Филипче и Министерството за здравство ја информираат точно и навремено јавноста до секој детаљ.“
Министерството за здравство понатаму апелира да престанат да се изнесуваат неточни информации во време на вонредна состојба со коронавирус за собирање на дневнополитички поени.
Оттаму исто така нагласуваат дека стојат на располагање и отворени се за какво било појаснување или одговор во секое време, „пред да се пласираат неточни информации во јавноста, кои внесуваат забуна, паника и се на штета на јавноста“.