Откако завчера го победи и градскиот ривал Работнички, денеска кошаркарите на МЗТ буквално го прегазија црногорскиот претставник и тоа на гостински терен.
„Сино-белите“ одиграа блескаво, а сите во тимот го дадоа максимумот, па и повеќе од тоа, што резултираше со најубедливата партија во досегашните настапи во ова регионално натпреварување.
МЗТ погоди 18 тројки со 63% прецизност, беа доминантни во скок-играта (40-36), а остварија дури 7 блокади, од кои 4 беа на Андрија Бојиќ уште во првата четвртина.
Дамјан Стојановски со 15 поени (5/6 за тројка) беше најпрецизен во македонскиот тим, Бојан Крстевски и Хасани Гравет реализираа по 13 поени, а Бојиќ 11 поени. Кристијан Николов средбата ја заврши со 9 поени (3/5 за тројка), Андреј Магдевски постигна 8 со 5 асистенции, а за одбележување е и настапот на Френк Тарнер со 6 поени, 6 скокови и 4 асистенции.
Со оваа победа сега МЗТ е втор на табелата со скор од 6-3, додека лидер е перфектниот Студентски Центар кој има максимални 9 победи.
Последниот натпревар за МЗТ од турнирот во Сараево е задутре против Младост од Земун со почеток во 16 часот.