Македонскиот кошаркарски шамион нема да ја користи понудената државна помош за спортистите и клубовите, а покрај тоа донираше и 100.000 денари како помош за набавка на заштитна опрема за здравствените работници.
„Ја информираме јавноста дека нема да ги користиме субвенциите предвидени според Законската уредба за финансиска поддршка на спортисти, спортски работници и спортска администрација за време на вонредна состојба, со цел тие средства да останат во буџетот и да бидат употребени на подобар начин во борбата против заедничкото зло на сите нас, болеста COVID-19“, почнува официјалното соопштение на клупската веб-страница.
Кошаркарската сезона во македонската Суперлига е во прекин по 17. коло, а лидер е токму МЗТ со 31 бод пред Работнички и Гостивар кои имаат по 29.
„Нашиот клуб, воедно, на конкретен начин се приклучи на иницијативата #СпортистиПротивКоронавирусот и тоа со донација од 100.000 денари на наменската сметка, од која потоа ќе бидат обезбедени заштитни маски и опрема за здравствените работници, кои се во првиот одбранбен ред, како и средства за дезинфекција и хигиена за социјално најзагрозените лица. Со ова уште еднаш сакаме да покажеме дека сме општествено-одговорен спортски колектив, кој секогаш јавното добро на сите во државата го става пред личниот интерес“, велат од клубот од населбата Аеродром.
МЗТ ги повика и останатите македонски спортски клубови кои финансиски стојат добро истотака да се откажат од државните средства и со тоа да помогнат во борбата со епидемијата.