Најголемата закана по македонскиот гол во претстојниот бараж за пласман на ЕУРО, Ведат Муриќи, е позитивен на коронавирусот и ќе мора да оди во карантин.
Новопечениот играч на Лацио неколку пати патувал на релација Рим - Истанбул, а на последниот тест излегол позитивен на COVID-19.
Муриќи моментално се опоравува од мускулна повреда со која се здоби на еден од последните тренинзи со Фенербахче. Лекарските прогнози од Лацио велат дека поради короната и повредата ќе може да игра тек по интернационалната пауза.
Тоа значи дека Муриќи е неизвесен за дуелот со Македонија во Скопје кој ќе се игра на 8 октомври. Муриќи ќе мора прво да оди во самоизолација поради короната, од која ќе излезе кога ќе добие негативен тест. Тоа ќе му ја отежни работата со враќањето од повредата и треенажниот процес, па затоа е и неизвесен за важниот дуел во Скопје.
Секако, тоа е добра вест за македонската репрезентација бидејќи Ведат е најдобриот голгетер на Косово. На 23 натпревари има постигнати 8 голови, всушност најмногу во кратката историјата на оваа нова репрезентација.
Победникот од Македонија - Косово потоа оди во финалниот бараж каде ќе се сретне со подобриот од дуелот на Грузија и Белорусија, а севкупниот победник ќе се пласира на ЕУРО.