Тимот од Санкт Петербург е старо-нов шампион на Русија откако синоќа со победата на гости кај Краснодар математички ја осигура титулата.
Откако московски Локомотив, кој е второпласиран, одигра само 0:0 дома против Сочи, Зенит доби можност со победа во Краснодар да ја завери титулата.
Иранскиот голгетер Сардар Азмун уште во 5. минута го најави славјето. Домашните израмнија преку Даниил Уткин, а потоа Масиел Вандерсон промаши пенал за водство бидејќи голманот Андреј Лунин го одбрани неговиот удар. Казната стигна во последните моменти од првиот дел кога Артјом Ѕјуба реализираше од белата точка за ново водство на „Сино-белите“.
По пет минути игра во вториот дел Уткин повторно израмни, но Азмун само две минути подоцна го врати водство за Зенит кое во 72. минута го запечати Алекс Сутормин.
На 4 кола до крајот Зенит има 62 бода, дури 13 повеќе од вториот Локомотив. Краснодар е трет со 45 и заедно со Ростов и ЦСКА ќе се борат за преостанататите две места во Лигата на шампионите каде Зенит како шампион обезбеди пласман директно во групната фаза.
„Сино-белите“ по седми пат се шампиони на Русија откако претходно славеа во сезоните 1984 (тогаш СССР), 2007, 2010, 2012, 2015 и 2019.
