На белградскиот меѓународен аеродром „Никола Тесла“ во текот на проверка на багаж откриени се две ракети со експлозивно полнење кои биле транспортирани од Бејрут преку Белград и Лондон за американскиот град Портланд, потврди во неделата воздухопловната компанија „Air Serbia“ по пишувањето на медиумите.
„Потврдуваме дека карго пратката, која е транспортирана за натамошна дестинација, претходно во текот на денот е идентификувана на белградскиот аеродром, благодарејќи на строгите мерки за безбедносна контрола“, изјавиле за агенцијата Танјуг од „Air Serbia“ и додаваат дека помагаат во истрагата.
Ракетите со должина од 1,5 метар биле во багажот на редовниот лет Бејрут – Белград, а требале да бидат пренесени од Бејрут преку Белград и Лондон за Портланд.
Ракетите, според пишувањата во медиумите, биле во сандаци и имале соодветна документација. Во согласност со стандардната процедура биле истоварени од авионот, но полициските кучиња го надушкале експлозивот. Сандаците биле веднаш издвоени и извршен е увид, а во тек е проверка на документацијата.
„Очигледно станува збор за шверц на оружје, бидејќи ракетите биле пакувани како школски макети и имале таква документација. Меѓутоа, кучињата го надушкале експлозивот во пакетите и по отворањето е утврдено дека, сепак, станува збор за ракети и покрената е истрага“, пишува Блиц повикувајќи се на неофицијални извори.
