На денешен ден, во 1995 година, во Скопје починал славниот актер Петре Прличко. Многумина го прогласија за легенда додека сè уште беше жив.
Роден е на 13 март 1907 година во Велес. Сам по себе претставува вистинска легенда и зазема голем удел во македонскиот театар и филм во 20 век. Откако прошетал низ неколку театарски дружини, во 1931 година, охрабрен од начинот на кој го примила публиката, тој основал сопствен театар наречен „Боем“.
Од 1939 г. членувал во Народниот театар во Скопје, па од 1944 година во партизанскиот театар „Кочо Рацин“ кој подоцна прераснува во Македонскиот народен театар. Токму тука неговиот талент блеснува во полн сјај и тој станува најзначајната личност на македонската сцена во тоа време. Во меѓувреме го испробува својот талент и како театарски режисер.
Со филмот „Фросина“ (1952) има филмско деби. Со импресивните комични трансформации и изведби на улоги на „човек од народот“ се истакнува со посебен уметнички сензибилитет, на ниво на кое може да му завидат многу други наши глумци.
Добитник е на многу награди и признанија, меѓу кои наградите: АВНОЈ, „11 Октомври“, „Бранко Гавела“, Орден за заслуга (доделен од Георги Димитров) и други.
Ќе остане запаметен по многу улоги како Мандана во „Мис Стон“, стрико Тале во „Мирно лето“, Никола Попов во „Солунските атентатори“, Фезлиев во „Денови на искушение“, Мојсо во „Македонска крвава свадба“ и други филмови.
