Освен за веќе отпочнатиот судски процес „Насилство“, поранешниот премиер и лидер на ВМРО-ДПМНЕ, Никола Груевски, е обвинет во четири случаи на Специјалното јавно обвинителство, „Титаник“ за изборните измами, „ТНТ“ за уривањето на објектот „Космос“ на Фијат Цановски, „Траекторија“ за изградбата на автопатиштата и „Тенк“ за набавката на мерцедесот од 580.000 евра.
Груевски во случајот „Титаник“ е обвинет за три кривични дела. За кривичното дело „злосторничко здружување“ му се заканува затворска казна од една до пет години. За „злоупотреба на средствата за финансирање на изборната кампања“ е пропишана затворска казна од најмалку пет години, а за „повреда на избирачкото право“, затворска казна од најмалку три години. Во случајот „ТНТ“, Груевски е обвинет за кривичното дело „злоупотреба на службената положба и овластување“ за што е предвидена затворска казна од најмалку три години.
Против поранешниот премиер Груевски се поднесени и два обвинителни предлога, и тоа за случаите „Траекторија“ и „Тенк“. Тој се гони за исто дело и тоа „примање награда за противзаконито влијание “, за што е предвидена затворска казна од една до три години. Во случајот „Насилство“ за нередите пред општина Центар, максималната казна затвор за Груевски како организатор на протестите е пет години.
Статистичката претпоставка покажува дека доколку се соберат предвидените затворски казни за делата за кои се гони, тогаш на Груевски му се заканува максимална затворска казна од 25 години. Сепак, доколку Груевски биде осуден, може да добие и многу помали затворски казни.