Севернокорејскиот лидер Ким Џонг Ун страда од здравствени проблеми поврзани со дебелината, вклучувајќи висок крвен притисок и дијабетес, соопшти јужнокорејската шпионска агенција.
Националната разузнавачка служба, главната јужнокорејска шпионска агенција, соопшти дека помошниците на Ким се обидуваат да набават нови лекови од странство за да му помогнат на севернокорејскиот лидер.
40-годишниот Ким, за кој се вели дека е зависен од алкохол и пушење, потекнува од семејство со историја на срцеви проблеми, пишува Sky News.
И неговиот татко Ким Џонг Ил и неговиот дедо Ким Ил Сунг, кој владеел пред него, починале од проблеми со срцето. Ким, кој ја презеде власта во 2011 година, по смртта на неговиот татко, е висок околу 170 сантиметри, а претходно тежеше 140 килограми, што го става во категоријата дебели на скалата за индекс на телесна маса.
Се чинеше дека ослабел значително во 2021 година, веројатно поради промена на исхраната, но неодамнешните снимки од државните медиуми покажуваат дека тој повторно се здебелил. Јужнокорејското разузнавање објави дека Ким повторно има 140 килограми.
Претставници на разузнавањето нагласија на состанокот дека Ким покажува симптоми на висок крвен притисок и дијабетес уште од неговите рани 30-ти и најверојатно ќе се соочи со проблеми со срцето доколку не ги промени своите навики, рече Ли Сеонг-квеун, еден од јужнокорејските политичари кои присуствуваа на брифингот зад затворени врати.
Парк Сунвон, друга политичарка која присуствуваше на брифингот на јужнокорејските разузнавачки служби, рече дека разузнавачите веруваат дека дебелината на Ким е поврзана со консумирање алкохол, пушење и стрес.
Северна Кореја е една од најтаинствените земји во светот и практично нема начин странските земји да дознаат за здравјето на Ким. Прашањето за неговото здравје е од интерес за меѓународната заедница бидејќи официјално не е одлучено кој ќе го наследи и ќе ја преземе контролата врз растечкиот нуклеарен арсенал на земјата.
Неговата ќерка, за која се вели дека се вика Ким Џу Ае и има 10 години, се чини дека е во најдобра позиција, сметаат јужнокорејските разузнавачи.
Сепак, тие одбија да исклучат дека на власт би можело да дојде некое друго од децата на Ким.
10-годишното девојче му се придружи на татка си на голем број јавни настани од висок профил во последните две години.
Државните медиуми ја нарекоа „омилено“ дете на Ким Џонг Ун и емитуваа снимки и фотографии за да ја покажат нејзината растечка политичка важност и блискост со татко ѝ.
