Ојмјакон се смета за најладното населено место на светот. Станува збор за село во зафрлените источни краишта на Сибир во Русија.
Најниската температура таму била измерена во февруари, 1993 година и изнесувала 71,2 Целзиусови степени под нулата.
Тоа е број што ќе го видите испишан на сувенири од Ојмјакон. Иако никогаш повторно не била измерена олку ниска температура таму, зимите во ова село се прилично сурови и сосема е нормално во јануари да има температури околу -50°C.
Порано Ојмјакон било местото каде што сточарите застанувале за да може ирвасите да се напијат вода од блискиот термален извор кој никогаш не замрзнува, но денес таму има околу 500 жители.
Животот во зимските месеци не е лесен, но локалните жители се прилагодиле на екстремните услови.
Земјата е трајно замрзната во текот на целата година и речиси ништо не може да се одгледува во неа, па локалното население главно се храни со риба и месо од ирваси и коњи, како и млечни производи. Во шумите наоѓаат диви шумски овошја кои ги мешаат со смрзнато млеко и така го прават ојмјаконскиот специјалитет сличен на сладолед.
Во Ојмјакон не ви се доволни само еден пар ракавици и еден капут. Селаните се облекуваат во слоеви – многу, многу слоеви и парчиња облека.
Исто така не изненадува фактот дека не можете да стартувате автомобил, а и авионите не може да полетаат. Во текот на суровите зимски месеци локалните жители излегуваат дома само ако навистина мораат.
Чистиот воздух и домашната храна без индустриски преработки и додатоци придонесуваат жителите на Ојмјакон да бидат прилично здрави и имаат долг просечен животен век.
На ладното се навикнати дури и кучињата – тие можат да спијат на отворено дури и кога температурите паѓаат под -50°C.
