Серхио Перес би можел да го напушти Ред Бул уште ова лето доколку се точни информациите за клаузулата во договорот за разликата во бодови до Макс Верстапен по серијата лоши трки кои кулминираа во Силверстоун.
По четири подиуми во првите пет трки, Перес имаше лош прв викенд во Имола во кој не се квалификуваше за Q3 и од 11-то заврши на 8. место, а потоа следуваше серија од пет трки на кои само двапати освои поени.
Од Големата награда на Емилија-Ромања до денес (шест трки), Верстапен има освоено 119 поени наспроти само 15-те на Перес, што предизвикува сериозни сомнежи за неговата способност да освојува поени во сè потесната битка на Ред Бул со Мекларен, Ферари и Мерцедес.
Ред Бул неодамна го продолжи договорот со Перес за уште две години, но според Autosport, повикувајќи се на добро информирани извори, Мексиканецот има клаузула во договорот која вели дека Ред Бул има право да го раскине неговиот договор доколку разликата до Верстапен е 100 или повеќе бодови пред летната пауза или на крајот на сезоната.
Перес моментално заостанува зад Верстапен со 137 поени со две трки до крајот на летната пауза, и тешко е да се замисли да ја намали разликата на под 100 поени со оглед на неговата моментална форма.
Минатата година Перес заврши на второто место во поредокот за возачи, но во многу побрз болид во споредба со конкуренцијата од оваа година, бидејќи Мерцедес, Ферари и Мекларен значително ја намалија разликата во перформансите.
Верстапен има огромна предност од 84 поени пред Норис по точно половина (12/24) од шампионатот, со Ред Бул 71 поен пред Ферари и 78 пред Мекларен. Но, ако Перес продолжи да собира нула или помали поени, конструкторската титула на Ред Бул може да биде доведена во прашање во преостанатите 12 трки.
Што се однесува до опциите на Ред Бул за замена на Перес, тука се Даниел Рикардо и Јуки Цунода, но Ред Бул наводно повеќе размислуваат за Лиам Лосон, кој импресионираше минатата година на петте трки на кои го менуваше Рикардо.
Оваа недела во Силверстоун Лосон ќе го вози актуелниот RB20 како дел од денот на филмот, што според Хорнер е долго планирана активност, но на крајот на месецот Лосон ќе го вози и две години стариот автомобил во Имола, што ќе биде дополнителна можност за тестирање на неговите перформанси.
Во текот на својата историја, Ред Бул менуваше возачи во текот на сезоната, а во 2019 година, по летната пауза, го замени Гасли со Албон, кој остана цела 2020 година пред доаѓањето на Перес во 2021 година.
