Тренерот на премиерлигашот Манчестер Јунајтед, Ерик тен Хаг, ќе има средба со клупското раководство на која ќе се разговара за евентуална казна за Кристијано Роналдо по повод контроверзното интервју кое португалскиот напаѓач го даде во разговор со водителот Пирс Морган, јавија денеска британските медиуми.
Според истите извори, на Роналдо му се заканува казна од клубот во износ од еден милион фунти.
Роналдо во интервјуто, меѓу другото, рече дека се чувствува предаден од Манчестер Јунајтед поради наводниот обид на клубот да го избрка од „Олд Трафорд“. Во разговорот со Морган, португалскиот напаѓач, исто така, наведе дека не го почитува тренерот Тен Хаг, бидејќи ниту тој нема почитување од холандскиот стратег.
Интервјуто, кое беше објавено по вчерашната победа на Манчестер Јунајтед над Фулам од 2:1 во рамки на 16-тото коло во Премиер лигата, предизвика големо внимание во Англија бидејќи Роналдо изнесе многу навреди кон својот клуб и оцени дека „Црвените ѓаволи“ воопшто не напредувале откако легендарниот Алекс Фергусон се повлече од тренерската клупа во 2013 година.
Роналдо не беше во составот на Јунајтед на неделниот дуел против Фулам, наводно, поради болест.
