Во белградската полиција не е пријавено исчезнувањето на двајца борачи од Мароко и тројца боксери од Конго и за нив официјално никој не трага, пишува Блиц.
Во Белград, според неофицијални податоци, вчера исчезнале двајца марокански борачи, а во средата се појавија информации дека тројца боксерски репрезентативци од Конго исчезнале од кампот на националниот тим во Белград, каде учествуваа на Светското првенство.
За исчезнувањето на петтемина спортисти не се знае ништо.
„Немаме никакви информации за нив. Кај нас ништо не е пријавено“, велат од полицијата за Блиц.
Според неофицијални информации, никој не знае зошто и каде исчезнале и дали им се случило нешто.
Дека се исчезнати тројца боксери од Конго вчера потврди боксерската федерација на оваа африканска земја.
Овие работи се вообичаени кога станува збор за спортисти од Африка, кои често ги користат големите спортски натпреварувања за да се обидат да избегаат во странство, во некоја земја каде ќе имаат подобар живот.
Минатата недела фудбалерки од Еритреја исчезнаа во Уганда во текот на регионален натпревар.
