Најмалку 148 луѓе загинале во Пакистан во експлозија на цистерна со нафта. Несреќата се случила откако цистерната се превртела, а луѓето од околните села со канти доаѓале да собираат од горивото што истекувало.
Локалните власти навеле дека полицијата го блокирала пристапот до цистерната, но мештаните го пробиле кордонот.
Во несреќата се повредени повеќе од 100 луѓе, а многумина имаат тешки изгореници.
Шефот на спасувачката служба на провинцијата Пенџаб, Ризван Насер, рекол дека спасувачите ги извлекуваат изгорените тела. Додал дека бројот на жртви веројатно ќе расте.
Несреќата се случила на националниот автопат на околу 100 километри од градот Мултан, кога возачот на цистерна која пренесувала нафта од јужниот пристаништен град Карачи до престолнината на покраината Пенџаб, Лахоре, изгубил контрола над возилото.
Пакистанската војска испратила хеликоптери за да ги евакуираат повредените и да ги пренесат во болница. Најблискиот медицински центар се наоѓа на оддалеченост од повеќе од 150 километри од местото на несреќата.