„Стотици деца на возраст меѓу 12 и 16 години во Израел се имунизирани со вакцината против коронавирус на Pfizer и не се пријавени несакани ефекти“, изјави за Guardian Боаз Лев, шеф на тимот за имунизација при израелското Министерство за здравство.
Весникот посочува дека ова е еден од првите знаци дека вакцината против коронавирус е безбедна и за децата, но претстои да бидат објавени резултатите од клиничкото испитување.
Израелското Министерство за здравство препорача вакцинирање на деца кои имаат болести поради што се во зголемен ризик од COVID-19.
„Досега имунизиравме околу 600 деца. Не се регистрирани некои поголеми несакани ефекти, а дури и малите нуспојави се доста ретки. Тоа е охрабрувачки“, појасни Лев.
Pfizer спроведува студија со која се опфатени деца на возраст меѓу 12 и 15 години, а се очекува наскоро да бидат опфатени и деца на возраст од 5 до 11 години.
Универзитетот Оксфорд објави дека започнa студии за тестирање на вакцината AstraZeneca на деца над 6 години. Резултатите од тоа истражување се очекуваат за неколку месеци.