Во интервал од само половина час двајца од најдобрите светски тенисери објавија дека се приморани да се откажат од настап на турнирот во Монте Карло.
Рафаел Надал прв објави дека нема да учествува откако не успеа да се опорави од повредата на абдоминалните мускули со која се здоби уште во јануари на Австралија опен.
„Сѐ уште на сум подготвен да играм на високо ниво. Нема да можам да играм на еден од најважните турнири во кариерата, Монте Карло. За жал, сѐ уште не можам да играм растеретено, без страв од повреда, но продолжувам со опоравувањето. Се надевам дека наскоро ќе се вратам“, напиша Надал на Twitter.
Не повеќе од половина час откако Надал соопшти дека нема да учествува, истото го објави и неговиот сонародник и втор светски рекет, Карлос Алкарас.
Тој преку социјалните мрежи соопшти дека се повлекува од Монте Карло, исто така наведувајќи проблеми поврзани со повреда.
„По два месеца натпреварување, задоволен сум што се враќам дома, но тажен сум бидејќи полуфиналето во Мајами го завршив со болки. Денеска го посетив мојот лекар д-р Хуанхо Лопес Мартинес во Мурсија и ми беше кажано дека нема да можам да одам во Монте Карло и да играм на земја“, твитна Алкарас.
Откажувањето на Надал и Алкарас практично значи дека најдобриот тенисер во светот, Новак Ѓоковиќ, има отворен пат кон пехарот во кнежеството, каде титулата освоена лани ја брани Стефанос Циципас.
Мастерсот во Монте Карло се игра од 9 до 16 април.
Веднаш потоа следува турнирот во Барселона, па останува да видиме дали двајцата ќе се опорават и ќе бидат дел од тој собир.