Шпанскиот тенисер Рафаел Надал доживеа пораз на земја после речиси една година, со што беше прекината големата низа на непобедливост на оваа подлога, а тој истакна дека многу пропуштил на почетокот на годината и дека тоа е причината поради која го загуби и првото место на АТП листата.
Надал беше поразен од Доминик Тим со резултат од 2:0 во сетови во Мадрид, а според неговото мислење, најважно е дека се чувствува добро и дека поразот не го доживеал поради некоја повреда.
„Не можете да бидете први, а да не играте пет месеци. Од Шангај до Монте Карло не го остварив она што го сакав, зборуваме за период од пет месеци. Минатата година стигнував до финалињата на речиси сите турнири, ова е реалноста до сега. Пропуштив многу работи и навистина немаше да биде реално ако и понатаму бев прв. Сепак, моментално и не размислувам премногу за тоа. Ќе видиме што ќе се случи на крај“, истакна Надал.
„Секако дека повеќе би сакал да бидам прв отколку втор, трет или петти. Го кажав тоа милион пати. Ја загубив лидерската позиција, но среќен сум што се чувствувам добро и што можам да играм на речиси секој натпревар“, заклучи шпанскиот тенисер.
Надал на лидерската позиција на АТП листата би можел да се врати веќе после следниот Мастерс во Рим.
Минатата година, Шпанецот исто така доживеа пораз од Тим, а од тогаш, се до новиот дуел со истиот овој тенисер, освои дури 50 последователни сетови на земја.