Шпанскиот тенисер Рафаел Надал се спротивставува на намерата на каталонските националисти да се одржи референдум за независност на Каталонија од Шпанија.
„Според мене, секој мора да ги почитува правото и законите. Никој не може да ги прескокне законите само затоа што некому тоа му одговара“, изјави Надал во интервју за мадридскиот весник „Ел Мундо“.
Реакцијата на светскиот тениски ас е сосема поинаква од онаа на поранешниот фудбалер, а сега тренер, Пеп Гвардиола, кој силно го подржува одржувањето на референдумот.
„Каталонците ќе гласаат, дури и ако шпанската држава тоа не го сака“, изјави во јуни годинава поранешниот тренер на Барселона на еден митиг во главниот каталонски град, организиран од сепаратистите.
Локалната каталонска влада во која доминираат националистите одлучи на 1 октомври да се одржи референдум за независност, иако претходно беше предупредувана дека тоа би значело прекршување на законот.
Рафаел Надал е роден и израснат во Мајорка, па тој, покрај шпанскиот, го зборува и каталонскиот јазик.
„Блиски ми се Каталонците, но се сметам себеси и за Шпанец, па затоа не сакам Шпанија да остане без Каталонија“, вели Надал за „Ел Мундо“.
