Рафаел Надал е сигурен дека може да го престигне Роџер Федерер по бројот на освоени гренд слем титули. Шпанецот досега има освоено 16 гренд слем титули, три помалку од Швајцарецот.
„Можно е, но ќе биде тешко. Никој не може да ми гарантира дека и на 36 години ќе играм тенис. Ќе играм додека тоа ми го дозволуваат умот и телото. Не сум исплашен или загрижен што кога-тогаш ќе мора да се пензионирам. Среќен сум и без тенисот, но во другите работи е тешко да се почувствува адреналинот што го носи спортот“, изјави Надал.
Шпанецот има најголеми шанси годината да ја заврши на првото место на АТП-листата, тој има 1.960 бода повеќе од Федерер.
„Број 1 на крајот од годината не беше една од целите кои си ги поставив на почетокот на сезоната. Секако, многу е подобро да се биде прв отколку трет, но мој приоритет е само да бидам среќен, а за да бидам среќен морам да почувствувам дека сум конкурентен, а за да бидам конкурентен потребно е да бидам здрав. Немам посебно чувство поради тоа што сум број 1, но тоа е награда за мојата работа. Клучната работа оваа година е повторно да не се повредам, освојувањето на титули и борба за се“, истакна Шпанецот.
