Oткако се пласираше во полуфиналето на Вимблдон победувајќи со 3:6, 7:5, 3:6, 7:5, 7:6(4) против Американецот Тејлор Фриц во четвртфиналето, Рафаел Надал изјави дека не е сигурен дали в петок ќе може да игра против Австралиецот Ник Кирјос.
Само учеството на Надал на овогодинешниот Вимблдон беше под знак прашалник поради повреда на стапалото, а против Фриц исто така мораше да побара лекарска помош поради повреда на стомачниот мускул. По победата за која му беа потребни четири часа и 20 минути, одличниот Шпанец изјави дека во неколку наврати размислувал да се откаже.
„Не е лесно да се откажеш од Вимблдон иако болката беше силна. Сакав да го завршам натпреварот, се борев, горд сум на фактот што успеав да бидам рамноправен во условите под кои играв. Не знам дали ќе можам да играм в петок. Сега не можам да ви дадам јасен одговор бидејќи не знам што ќе се случи утре. Имам проблеми со стомачните мускули веќе неколку дена, но сега беше најлошо“, изјави Надал.
Подоцна на прес-конференција се осврна на фактот дека неговиот татко му предложил да го прекине натпреварот. „Многу ми е тешко да се откажам од мечот на сред игра. Долго размислував на тоа, ми рекоа дека треба да го предадам, но мразам да го правам тоа. Но, од друга страна, го направив тоа неколку пати во кариерата“, рече освојувачот на 22 Грен слем титули.
„Сега се соочувам со многу работи со кои не сум се соочил претходно, но навикнат сум да играм со болки и проблеми. Денеска не беше најлош ден за тоа. Болката многу се зголеми, но сепак успеав да победам. Ќе видиме што ќе покажат наодите утре.“
Оваа година Надал ги освои Австралија Опен и Ролан Гарос, достигнувајќи вкупно 22 Грен слем титули во кариерата, две повеќе од Роџер Федерер и Новак Ѓоковиќ, а уште има шанса да ги освои сите четири големи турнири во иста година.