Сцените од лондонската О2 Арена од последниот меч на Роџер Федерер го обиколија светот и долго ќе се паметат. Швајцарецот заплака и не можеше да ги сокрие емоциите, но солзите на неговите ривали Рафаел Надал и Новак Ѓоковиќ беа особено трогателни.
Швајцарскиот тенисер Роџер Федерер го одигра последниот меч во кариерата, на Лејвер куп во Лондон. Кариерата ја заврши со играње во пар со долгогодишниот и голем ривал и пријател Рафаел Надал.
Федерер и Надал одиграа меч против Џек Сок и Френсис Тиафо во кој беа поразени со 2 : 1 во сетови (4 : 6, 7 : 6, 11 : 9), но резултатот беше во втор план поради настаните што следеа по него.
Збогувањето беше многу емотивно, а 41-годишниот тенисер со солзи истакна дека е среќен по ова „патување“ проткаено со големи успеси.
Надал потоа седна покрај Федерер на клупата и заплака, а емотивната атмосфера го достигна врвот кога и Ѓоковиќ „се скрши“. Го прегрна Роџер, па му оддаде и признание.
Швајцарецот освои 20 Грен слем титули и 6 години беше најдобар во светот. Пред него се Рафаел Надал со 22 Грен слем титули и Новак Ѓоковиќ со 21.
Вкупно освои 103 АТП турнири, што е повеќе од Надал и Ѓоковиќ.
