Нема да размислувам за пензија, важно ми е само ако можам да ѝ помогнам на Шпанија да го освои новиот Дејвис куп“, изјави шпанскиот тенисер Рафаел Надал, кој наскоро ќе престане да игра.
Легендарниот тенисер, кој во текот на својата голема кариера освои 22 Грен слем титули, од кои неверојатни 14 пати освои на Ролан Гарос, претходно најави дека крајот на Дејвис купот оваа година ќе биде крај на неговата кариера.
„Доколку сум на теренот во Малага, најважно ќе ми биде да ги контролирам емоциите. Не сум во репрезентативниот круг за да се пензионирам, но тука сум да помогнам ако е потребно на пат до освојување на нов пехар, ова ќе биде мојата последна недела, но јас сум во служба на тимот и ја посакувам севкупната победа“, изјави 38-годишниот Надал, кој во текот на својата кариера четири пати го освојуваше ова натпреварување за Шпанија: во 2004, 2009, 2011 и во 2019 година.
Сега првото име на шпанската репрезентација е Карлос Алкарас, а Надал би можел да ѝ помогне на тимот играјќи во двојки за време на Дејвис купот.
„Се чувствувам добро, а емоциите околу заминувањето ќе испливаат на површина дури на крајот. Работам, тренирам и сакам да бидам целосно подготвен ако дојде моментот кога треба да помогнам. По Дејвис купот ќе се случи голема промена во мојот живот. Најдобро е тоа што ќе можам да се збогувам во мојата земја, пред моите навивачи и во кругот на мојата репрезентација“, рече Надал на крајот.
Малага ќе биде домаќин на финалето на Дејвис купот од 19 до 24 ноември, а Шпанија во четврт-финалето ќе игра со Холандија. Останатите четвртфинални двојки се Германија - Канада, Италија - Аргентина и САД - Австралија.
