Рафаел Надал со победата над Григор Димитров со резултат 2:1 во сетови се пласираше во полуфиналето на Мастерсот во Шангај.
Во првиот сет двајцата тенисери цврсто се држеа до своите сервиси, сѐ до деветтиот гем, кога Надал ја искористи четвртата брејк-топка и го реши сетот во своја корист со резултат од 6:4.
Во вториот сет исто така играта беше изедначена, но за разлика од првиот видовме само една брејк-топка, која не беше искористена, па сетот мораше да се решава во тај-брејк. Со помош на три мини-брејкови Димитров успеа да се избори за изедначување од 1:1 во сетови.
Тоа не го демотивираше Надал, кој во третиот сет одигра најдобро и го доби дуелот со 2:1.
Рафаел Надал во полуфиналето ќе игра против Марин Чилиќ, кој претходно со резултат 2:0 го совлада Алберт Рамос.
