Шпанскиот тенисер Рафаел Надал е поразен од Холанѓанецот Ботика ван де Зандшулп со 2:0 во сетови (6:4, 6:4) во четвртфиналето на Дејвис купот што Шпанија го игра против Холандија во Малага.
Надал уште во октомври најави повлекување од тенисот во дуелите со Холандија во Дејвис купот, но крајот беше повеќе од болен.
Пред натпреварот се интонираа државните химни, а Надал беше крајно емотивен, а на неговото лице можеа да се забележат солзи. Во првиот сет Ван де Зандшулп направи брејк на 4:4 и го доби првиот сет со 6:4.
Во вториот рано стекна две брејк топки, по што Рафа успеа да врати една, но немаше шанси за пресврт Надал, кој на збогувањето не беше ниту сенка на поранешниот најдобар тенисер во светот.
Иако постои можност Надал да игра во двојки, што допрва треба да се потврди, сè поизвесно е дека ова му беше последен меч во кариерата.
Во текот на неговата прекрасна кариера, Надал освои 22 Грен слем титули, вклучувајќи 14 на Ролан Гарос. На тоа додаде четири титули на УС Опен и по две титули на Австралија Опен и Вимблдон.
Тој исто така го освои олимпиското злато во Пекинг во 2008 година и 36 титули на Мастерс. Беше дел од најголемото трио во историјата на тенисот заедно со Роџер Федерер и Новак Ѓоковиќ, а јасно е дека по нивното заминување „белиот“ спорт никогаш повеќе нема да биде истиот.
