Шпанскиот тенисер Рафаел Надал во 2021 година не успеа да покаже најдоброто од себе на теренот во Австралија, затоа што страдаше од повреда на грбот.
Сепак, шпанските медиуми ги пренесуваат изјавите на тамошните лекари, кои сметаат дека Надал страда од болеста Милер-Вајс што ги напаѓа коските на стапалата, а со тек на време се шири и на другите делови од телото, особено на колената. Надал често имаше проблеми со колената.
Наводно, Надал дознал за оваа болест уште во 2005 година, кога ги имал првите полесни повреди, но тогаш му било кажано дека поголемите симптоми се појавуваат на подоцнежна возраст.
„Тешко е да се заклучи дека се работи за оваа болест кога уште е во рана фаза. Лекарите можат да потврдат само откако болеста ќе почне да напредува. Болката се појавува во средината и задниот дел на стапалото, овие делови отекуваат, а болката потоа се пренесува нагоре, преку глуждот до коленото. Ако пациентот често оди или трча, ситуацијата се влошува“, го цитираат лекарот шпанските медиуми.
Поради тоа, Надал можно е да страда многу, токму во финишот на кариерата, кога движењето ќе му станува сѐ потешко.
Како пример, се посочува дека оваа мистериозна болест се јавува кај физички работници или куќни помошници, откако ќе достигнат одредена возраст.
Постои можност за ублажување на овие проблеми со специјални анатомски патики, специјално дизајнирани, по кои Шпанецот сигурно ќе посегне.
Вистина е дека болеста Милер-Вајс е недоволно истражена, но се нагласува дека на тенисерот „речиси сигурно ќе му биде тешко да се движи и да се ‘лизга’ по теренот како во најдобрите денови“.
За потсетување, Надал неодамна го откажа учеството на турнирите во Ротердам и Акапулко.
