Второто светско тениско име, Рафаел Надал, најверојатно ќе игра на турнирот од серијата Мастерс 1000 во Париз, кој почнува кон крајот на месецов.
Ова го откри Анхел Луис Которо, првиот човек на медицинскиот тим при Шпанската тениска федерација која со години соработува со носителот на 22 грен слем титули.
Надал неодамна стана татко, а во главниот град на Франција би требало да го одигра првиот официјален натпревар од Лајвер купот каде играше во пар со сега веќе пензионираниот Роџер Федерер.
„Рафа е добар. Тренира нормално и мислам дека ќе одигра одлични турнири до крајот на сезоната“, рече Которо.
На прашањето што е тоа што Надал и на 36 години го држи на врвно ниво, Которо одговори:
„Тајната на неговиот успех се напорната работа, посветеноста и желбата секојдневно да напредува. Надал е еден од најважниоте играчи во историјата на спортот и сите сме среќни што и натаму е на теренот“.
Се очекува Надал по Париз да игра и на завршниот мастерс во Торино. Шпанецот годинава триумфираше на Австралија опен и Ролан Гарос.
Мастерсот во Парис почнува на 29 октомври, а бранител на тронот е Новак Ѓоковиќ.