Надал заплака на збогувањето: Памтете ме не само како тенисер, туку и како добар човек

Холандската тениска репрезентација со победа од 2:1 ја запре Шпанија во четвртфиналето на Дејвис купот во Малага, со што и официјално ја заврши играчката кариера на Рафаел Надал. Во решавачкиот меч холандските двојки Ботик ван де Зандсхулп и Весли Коолхоф ги совладаа Карлос Алкарас и Марсел Гранољерс со 7:6 (7:4), 7:6 (7:3).

„Постигнав повеќе отколку што можев да сонувам, сакам да ме паметат како добра личност. Заврши 20-годишната професионална кариера, во која ме носевте во добрите моменти, а во лошите ме туркавте да продолжам да играм. Ѝ честитам на Холандија за победата. Му честитан и на тимот на Шпанија бидејќи ми дозволија повторно да играм на Дејвис купот, кој не заврши како што сите сакавме. Проживеав многу важни моменти во кариерата со вас, тоа беше привилегија“, рече Надал во својот проштален говор.

Шпанецот во кариерата освои 92 титули, вклучувајќи 22 Грен слем трофеја. Со шпанскиот тим 4 пати го освојуваше Дејвис купот.

„Реалноста е дека човек никогаш не сака да дојде до овој момент, не сум уморен од тенис, но моето тело не сака повеќе да играм и морам да го прифатам тоа. Се чувствувам привилегирано, можам да бидам благодарен што моето хоби ми е професија“, додаде Шпанецот.

Надал истакна дека сака да биде запаметен како добар човек. „Титулите, бројките се таму, луѓето го знаат тоа, но јас би сакал да бидам запаметен како добар човек од мал град во Мајорка кој имаше среќа да има вујко кој беше тениски тренер и одлично семејство кое ме поддржуваше во секој момент. Имам среќа, бидејќи животот ми даде можност да доживеам незаборавни работи благодарение на тенисот“, заклучи Надал.