Дебатата за влијанието на прекумерниот туризам врз грчкиот остров Санторини се засили во вторникот, кога 11.000 патници пристигнаа на островот за еден ден.

Сместен во Егејското Море, Санторини е еден од најпопуларните грчки острови меѓу туристите. Познат е по своите мали гратчиња со карактеристични бели куќи, сместени на падините на карпите.
Минатата година го посетија повеќе од 5 милиони луѓе. Санторини има 15.500 постојани жители.
Во вторникот бродовите за крстарење донесоа 11 илјади туристи. Заедно со туристите кои веќе беа на островот, тој ден имаше повеќе гости отколку жители на Санторини.

Еден од членовите на локалната власт, Панајотис Каваларис, на социјалните мрежи објави апел до жителите да го ограничат излегувањето или, уште подобро, да останат дома.
Објавата брзо исчезна од интернет, но сепак успеа да предизвика многу контроверзии. Многу жители на Санторини беа огорчени што мораа да останат дома додека посетителите можеа да пешачат и да возат каде што сакаат, пишуваат грчките медиуми.

Градоначалникот на Санторини, Никос Зорзос, се обиде да ги смири работите со ветување дека повторно ќе воведе ограничување на бројот на туристи со бродови за крстарење. Бројот на луѓе кои го напуштаат бродот за крстарење во еден ден не треба да надминува 8.000.
„Ние, исто така, треба да изградиме ново пристаниште, да ја подобриме енергетската инфраструктура и да го подобриме планирањето на градот. Треба да го регулираме и работењето на хотелите и услугите за изнајмување како што е Airbnb“, додаде Зорзос.
За таа цел, градоначалникот на Санторини претходно организираше средба со претставници на властите на сите Киклади, парламентарци од регионот и претставници на различни министерства.