Како што се развива конфликтот меѓу Азербејџан и Ерменија за Нагорно-Карабах, станува сѐ појасно дека зад оваа војна се крие друга – војна на релација Русија-Турција.
Русија има одбранбен сојуз со Ерменија, а Турција ја поддржува својата етничка заедница во Азербејџан. Во регионот Нагорно-Карабак, кој се наоѓа во Азербејџан, поголемиот дел од населението се всушност Ерменци.
Засега никој не може со сигурност да каже кој прв почна во последниот судир на двете држави околу спорниот регион, бидејќи на ова тло конфликтот тлее со децении. Исто така, никој нема јавно да каже дека зад сево ова се крие „војна“ на двајца лидери – рускиот и турскиот. Но, полека станува очигледно дека ако ситуацијата ескалира, тоа ќе ги стави Турција и Русија во многу сериозна позиција, а со нив и остатокот од светот.
Азербејџан тврди дека е нападнат и во разговорите на претседателот на земјата со светските лидери, тој истакнува дека нивните напади со тешка артилерија се всушност контраофанзива, односно дека Ереван ја почнал актуелната војна и таму треба да се упатат прашањата кога ова ќе заврши.
Од друга страна, ерменскиот премиер Никол Пашинјан тврди дека зад сево ова стои Турција. Според светските новински агенции, тој телефонски разговарал со генералниот секретар на ОН Антониу Гутереш, како и со германската канцеларка Ангела Меркел.
Наводно, разговорот со Гутереш го иницирал токму првиот човек на ОН, барем судејќи по тврдењата на ерменската влада.
„Никол Пашинјан истакна дека за разлика од ескалациите во изминатите години, сегашниот конфликт го карактеризира многу активно и пристрасно делување од Турција и нејзино директно дестабилизирачко присуство во акциите на Азербејџан“, се наведува во соопштението.
Шефот на ОН разговарал и со азербејџанскиот претседател Илхам Алијев и го повикал веднаш да биде прекинат огнот во Нагорно-Карабах.
Баку на 27 септември соопшти дека Ерменија фрлила гранати на позиции на азербејџанската војска, а Ереван тврдеше дека азербејџанските вооружени сили тргнале во офанзива кон Нагорно-Карабах. И двете страни пријавија жртви, вклучувајќи и цивили. И Ерменија, и Азербејџан прогласија вонредна состојба и мобилизација на војската.
