Смирувањето на конфликтот меѓу Ерменија и Азербејџан е незамисливо без Москва, изјави за Deutsche Welle политикологот и експерт за регионот Штефан Мајстер.
Западот има мало влијание врз ситуацијата, додека Турција додава масло на огнот.
„Малку сум изненаден од интензитетот, но не и од фактот дека ситуацијата ескалираше“, вели германскиот политиколог Штефан Мајстер, директор на Канцеларијата на Фондацијата Хајнрих Бел за Јужен Кавказ.
Мајстер за Deutsche Welle наведува дека реториката е заострена со недели, особено од азербејџанската страна. Во претходните недели беше извршена некаква мобилизација и подготовки за нова војна, а на крајот остри тонови стигнаа и од ерменска страна. Значи, беше јасно дека нешто ќе се случи во догледно време.
Според меѓународното право, Азербејџан има право на Нагорно-Карабах и седум други територии кои Ерменците ги анексираа, објаснува Мајстер. Ерменија, од друга страна, инсистира на правото на самоопределување на народот и посочува дека Нагорно-Карабах е претежно населен со Ерменци.
„Азербејџанската влада е особено фрустрирана, имајќи предвид дека преговорите во последните години, од нивна гледна точка, не постигнаа ништо“, објаснува Мајстер.
Клучевите се во рацете на Русите
Парадоксално е тоа што Турција сега е на „вистинската страна“, бидејќи ги поддржува принципите на меѓународното право, но Анкара додава повеќе масло на огнот со реториката и испораката на оружје до Баку, отколку што придонесува за мирно решение, додава германскиот политиколог.
Но, тој посочува дека одлучувачки играч сепак е Москва.
„Таа се гледа себеси во улога на искрен медијатор и се смета за неутрална. Но, неутралноста оди дотаму што Москва, на пример, ги снабдува со оружје двете страни. Од друга страна, Русија има воена база во Ерменија и затоа е заштитник на таа земја. Затоа, без согласност на Москва, ситуацијата нема да се смири и нема да се постигне прекин на огнот “, убеден е Штефан Мајстер.
„Не можам да замислам Турција да сака отворен конфликт со Русија“, додаде тој.
Тој верува дека во одреден момент, Турција ќе попушти, и на крајот Русија повторно ќе се обиде да постигне прекин на огнот меѓу завојуваните страни.
Кога станува збор за можностите на Европа, Мајстер е многу воздржан: „Европската Унија во овој судир кој има огромен потенцијал за конфликт, беше воздржана. Исто е и со Соединетите Американски Држави “.
