Потрагата по актерката Наја Ривера ќе продолжи наутро, откако полицијата и спасувачите денеска не успеаја да ја најдат откако исчезна во езеро во Јужна Калифорнија.
Ривера (33) исчезна за време на патување со брод заедно со четиригодишниот син, во езерото Пиру во Вентура Каунти. Полицијата рече дека потрагата ќе продолжи „со првите утрински сончеви зраци“ и дека засега постои сомневање дека актерката се удавила.
Таа попладнето (по локално време) изнајмила брод и испловила заедно со синот, но откако не се вратила по три часа, колку што го имала изнајмено бродот, крајбрежната стража го нашла бродот како бесцелно плови, а детето било внатре и спиело. Веднаш била почната истрага со нуркачи и хеликоптери.
Има многу информации во врска со случајот, но наводно детето рекло дека мајката отишла да плива и не се вратила. Детето имало на себе елек за спасување, а на бродот бил најден елек за спасување за возрасен.
Ривера се прослави со улогата на Сантана Лопез во популарната серија „Glee“ на Fox каде играше до 2015 година, а потоа имаше улога во серијата „The Royal Family“ и во комедијата „The Master of Disguise“.
Ривера претходно беше омажена за актерот Рајан Дорси.