Атина, 13 јуни 2018 (МИА) - „Комитетот за борба за грчкиот карактер на Македонија“, организаторите на протестите низ цела Грција за „одбрана на името Македонија“, преку социјалните мрежи и преку грчките медиуми најавува дека на денот кога Македонија и Грција ќе го потпишат договорот во Преспа, тие ќе одржат протест, а веројатно тоа ќе биде вo сабота.
- Ако Ципрас се обиде да оди во Преспа, онаму каде што се светите останки на Павлос Мелас и на останатите Македономахи што ги дадоа нивните животи за слободата на татковината, соопштуваме дека ќе бидеме таму, десетици илјади за да не дозволиме да се потпише договорот, соопштуваат од „Комитетот за борба за грчкиот карактер на Македонија“ и ги повикуваат, преку социјалните мрежи, граѓаните да им се придружат, а пратениците да си дадат оставка од нивните пратенички места.
Како што јави дописничката на МИА од Атина, по информацијата дека веројатно во петок, во грчкиот Парламент ќе се одржи расправа за постигнатиот договор за името, организаторите на протестите повикуваат на собир на атинскиот плоштад Синтагма, во исто време додека пратениците дискутираат за содржината на договорот.
