Веројатно многупати досега ви се има случено додека читате текстови на интернет, најчесто објавени во познати медиуми, па дури и на телевизија, да забележите очигледни правописни грешки. Дали знаете кои се најчестите?
На сите ни е јасно дека никој не е совршен, сите правиме грешки при говорење или пишување, но овде темата ни се најчестите правописни грешки кои ги прават новинарите.
Една од најчестите што ќе ги забележите е преВземе, наместо преземе исто како што не е Взаемно туку заемно. Ретко е познато дека правилно се пишува обЅир, а не обЗир.
Не може да „имаш во предвид“, туку може само да имаш предвид.
Грешки кои постојано се прават во пишувањето исто така се и:
- Се наместо сѐ
- Не наместо нас нѐ виде
- Сеуште наместо сѐ уште
- И наместо нејзе ѝ реков.
Потоа, кога сме кај грешките, не е допринос туку придонес, никако не си интелегентен туку интелигентен, не е било кој туку кој било (каков било, каде било). И не е сВатив туку е сфатив.
Често во различни јазични ситуации се случува да забележиме погрешна употреба на предлогот „по“ и наместо него се употребува прилогот за време „после“. Така, точниот пример е „По Втората светска војна“, а не „После Втората светска војна“.
Сепак, на интернет освен што ќе забележите многу правописни грешки во објавените текстови на македонски јазик, за среќа има и квалитетни кои се доста корисни и за читателите, а секако можат да послужат и како алатка за новинарите и сите оние кои сакаат да се изразуваат на правилен начин на пишување.
Еден таков профил што особено се истакнува и е вистинско јазично освежување на Instagram е профилот на Храмина.мк.
Во продолжение, погледнете на што треба да внимавате:
