Јаболковиот оцет е кисел овошен пијалок кој се добива со ферментација на сок од јаболко или цели јаболка. Често се користи во готвењето како прелив за салата, маринада или како состојка во разни јадења.
Покрај тоа, често се користи како природен конзерванс, но и како средство за чистење и дезинфекција на домаќинството.
Јаболковиот оцет е многу здрав напиток кој може да помогне за подобро и полесно варење, регулирање на нивото на шеќер во крвта, слабеење и одржување на здрава телесна тежина и зајакнување на имунитетот, што е многу важно во претстојната студена сезона.
Затоа искористете ја сезоната на јаболка за да направите јаболков оцет што можете да го користите на различни начини.
Состојките што ќе ви бидат потребни за овој рецепт се:
Шест до осум зрели јаболка
Еден литар вода (филтрирана или зовриена)
100 до 150 грама шеќер
Подготовка
Јаболката измијте ги и исечкајте ги на парчиња (не треба да ги лупите).
Сечканите јаболка ставете ги во стаклен или дрвен сад. Додадете шеќер и покријте ги јаболката со вода.
Покријте го садот со газа или чиста крпа и прицврстете го со гумена лента. Оставете на темно и топло место (околу 20-25°C) 3-4 недели.
Мешајте ја смесата секој ден за да спречите мувла и осигурајте се дека сокот ферментира рамномерно.
По 3-4 недели, процедете ја течноста преку газа или цедалка во чисто стаклено шише. Отстранете ги тврдите делови јаболко.
Вратете ја течноста во садот и повторно покријте ја со газа. Оставете уште 4-6 недели со повремено мешање.
По овој период, јаболковиот оцет треба да биде готов. Ако е доволно кисел, можете да го истурите во шише. Во спротивно, оставете го оцетот да ферментира уште неколку недели.
Чувајте го оцетот на ладно и темно место и користете го по потреба.
