Последни и единствени Олимписки игри каде американските атлетичари освоија повеќе медали, пред сѐ златни, од нивните сонародници пливачите, беа во Барселона во 1992 година. Можеби историјата ќе се повтори во Париз, а таквиот епилог е сосема реален кога ќе се погледне табелата. Атлетичарите на САД веќе имаат 11 медали, од кои 3 златни, а сме на само половина од натпреварувањето...
Секогаш пливачите и пливачките биле оние што носеле најмногу медали за САД, понекогаш и над 50, како во Мексико во 1968 година кога освоија вкупно 52, од кои 21 златен. Рекордниот број на најсјајни медали беше повторен во Лос Анџелес во 1984 година, но тогаш тимовите од Источниот блок не учествуваа на Игрите. Интересно е и тоа што во Лос Анџелес Американците немаа бронза во пливање.
Општо земено, бројот на освоени медали е околу 30, а бројот на златни медали само еднаш беше под 10, во 1988 година, кога Источните Германци ги „смачкаа“ во Сеул со 28 медали (11 златни), додека Американците освоија само 18 (8 златни), што е негативен рекорд ако се земат предвид Олимписките игри од 1968 година, кога бројот на дисциплини почна рапидно да расте, до денешните 37.
Од Мексико до Париз:
2024: 8 13 7 - 28
2020: 11 10 9 - 30
2016: 16 8 9 - 33
2012: 16 9 6 - 31
2008: 12 9 10 - 31
2004: 11 9 9 - 29
2000: 14 8 11 - 33
1996: 13 11 2 - 26
1992: 11 9 7 - 27
*** атлетиката пред пливањето со 12 злата
1988: 8 6 4 - 18
*** Источна Германија: 11 8 9 - 28
1984: 21 13 0 - 34
*** без Источниот блок
1980: САД бојкотираа
*** Источна Германија: 12 10 8 - 30
1976: 13 14 7 - 34
1972: 17 14 12 - 43
1968: 21 15 16 - 52
Американците беа најдобри во Париз, но едно е очигледно. Нивната доминација полека исчезнува и многу малку недостасуваше за првпат по Сеул некој да им го преземе тронот, а Австралијците сериозно се закануваа. Тие беа лидери до последниот ден, но САД некако со две злата успеаја да стигнат до бројката од 8 највредни медали, додека „Кенгурите“ останаа на 7. Во вкупниот број „Јенките“ се убедливо први со 28 медали. Австралија освои 18, Кина 12, но е само на петтото место со оглед на тоа што има само две злата. Помеѓу нив се Франција (4 златни) и Канада (3).
За американската пливачка репрезентација целосно разочарувачки звучи податокот дека само Боби Финк на 1.500 метри, ако ги исклучиме штафетите, освои злато во машка конкуренција. Второто и последно злато за мажите го донесе штафетата 4х100 метри слободно.
Честа на американското пливање ја одбрани легендарната Кејти Ледеки, пливачка која на 15 години го освои првото олимписко злато уште во Лондон, а по Париз има вкупно 9. Ледеки беше најдобра на 800 и 1.500 метри, а поединечно во Париз победија и Кејт Даглас на 200 метри грбно и Тори Хаски на 100 метри пеперутка. По едно злато освоија женските штафетни 4х100 и мешаните 4х100. САД ги теши и тоа што од 4 нови светски рекорди тие се сопственици на 3 - Финк и две штафети.
Треба да се земе предвид и дека во Париз немаше друга пливачка сила - Русија.
Никогаш повеќе дисциплини, никогаш помалку злата
На Олимписките игри во Токио во 1964 година имаше 18 дисциплини, а четири години подоцна во Мексико 29. Само во Монтреал беше променет бројот на дисциплини, но беше намален на 26. Повторно, по осум години, во Лос Анџелес во 1984 година се врати на 29. Во Сеул 1988 година и Барселона 1992 година имаше 31, а во Атланта 32. Во Сиднеј 2000 година имаше 33, во Атина 2004 година 32, а во Лондон, Пекинг и Рио де Жанеиро имаше по 34 пливачки дисциплини. На Олимпијадата во Токио и Париз имаме по 37 дисциплини.
Меѓутоа...
Американското пливање се гордее со фактот што Леон Маршан, Французинот кој доминираше на базенот за време на пливачките натпревари во Париз со 4 златни медали, е студент и натпреварувач на Државниот универзитет во Аризона и дека токму во нивната пливачка академија стекнал сѐ што требаше, а не можеше во родниот Тулуз и татковината, за врвни резултати на Олимписките игри. Американците се обидоа да го доведат во својот тим, но Маршан остана верен на својата татковина.
До целосното завршување на пливачките натпревари на Олимписките игри, остануваат трките на отворено за мажи и жени на растојание од 10 километри. САД ќе имаат по двајца претставници, па можеби ќе се зголеми бројот на златни медали или барем медал во пливање.
