Бешамел сосот е бел сос кој се користи и како основа за многу други сосови, а потекнува од Тоскана.
Сосот béchamel (бешамел) настанал во XVII век и денес важи за еден од главните сосови на француската кујна и нејзин заштитен знак. Подоцна навлегол и во италијанската кујна каде станал еден од основните сосови, а Италијанците го нарекуваат бешамела (besciamella) или балсамела (balsamella).
Денешниот рецепт е верзијата која потекнува од провинцијата Тоскана, иако бешамелот во Италија најмногу се применува во рецептите кои доаѓаат од историскиот регион Емилија, денес дел од провинцијата Емилија-Ромања, која граничи со Тоскана.
Потребни состојки:
- 500 мл полномасно млеко
- 50 гр путер
- 50 гр брашно
- ¼ лажичка ситна сол
- свежо рендано морско оревче
- 2 лажички пармезан во прав
Подготовка:
Растопете го путерот во тенџере на тивок оган. Додадете го брашното. Брзо измешајте со жица за матење. Мешајте додека смесата не стане мазна и без грутки. Загрејте го млекото, без да го доведете до вриење, а потоа полека прелијте го со смесата со брашно и путер, интензивно мешајќи со жицата за матење за да не се формираат грутки.
Мешајте постојано додека не добиете прилично густа конзистентност, околу 10-15 минути. Додадете прстофат сол и рендано морско оревче по вкус. За уште побогат вкус додадете малку пармезан во прав.
Готовиот сос можете да го користоте за јадење по ваш избор. Италијанците овој сос најмногу го користат за лазањи, канелони, различен вид на потпечена паста, а го комбинираат со зеленчуци како зелка, коморач и брокула.
