Ако досега не сте ја направиле, време е да ја пробате. Едноставен ладен прилог кој одлично одговара со печење, а може да се вклопи и на посната трпеза.
Компирот спаѓа во најпопуларните зеленчуци и тоа низ целиот свет. Од него може да се подготват најразлични јадења и прилози. Можете да го полните, правите помфрит или мусака..., а како што се наближуваат празниците ви предлагаме да направите тексашки компир. Одличен прилог е за печење, а се служи ладен. Се меша со краставички и кромид, а потоа се додава интересен прелив кој овој прилог го прави уште повкусен. Може да се направи и во посна варијанта, само мрсните состојки треба да ги замените со посни.
Потребни состојки:
- 200 гр кромид
- 150 гр јогурт (или посна кисела павлака)
- 1 лажичка шеќер (не полна)
- 1 лажичка сол
- 700 гр компири
- 300 гр кисели краставички
- 20 гр младо кромитче
- 15 гр копар
За сосот:
- 50 мл млеко (или растително млеко)
- 1 лажичка лук во прав
- 1 лажичка сенф
- 150 мл маслиново масло
- 1 лажица оцет
Подготовка:
Компирите добро сварете ги и кога ќе се изладат исечете ги на коцки. Кромидот исечкајте го на ленти, посолете го, додадете шеќер и јогурт. Добро измешајте и оставете да отстои 20 минути. Во садот во кој ќе сервирате измешајте ги компирите со смесата од јогурт. Додадете сечкани кисели краставички, младо кромитчле и копар. Добро измешајте. Во блендер измешајте млеко, лук во прав, маслиново масло, оцет, сенф сол и бибер. Добро изблендирајте и прелијте над салатата. Промешајте и изладете, а потоа послужете.