Индискиот Tata Nano во 2008 година беше најавен како најевтиниот автомобил на светот со цена од само 2.000 долари. Десет години подоцна, не го сака никој, дури ни во Индија.
Производителот на Tata Nano веруваше дека овој мал градски автомобил благодарение на неговата цена ќе се продава како алва, посебно во држава со огромна популација како Индија, која освен што е брзорастечки пазар, нема ни високи стандарди за безбедноста во сообраќајот.
Tata Nano беше наменет за луѓето со скромен буџет кои прв пат купуваат автомобил, како и за сите оние кои своите мопеди и скутери со мала дополнителна инвестиција би ги замениле за автомобил. Но, сите овие калкулации, во реалноста паднаа во вода. Неговата продажба се одвиваше под планираното - во јуни 2017 година се произведени само 275 автомобили, додека во истиот месец годинава, од производните ленти излезе само еден примерок.
Тоа што Tata Nano беше проектиран да ги задоволи основните потреби за автомобил на пошироката популација во Индија, автоматски не значеше дека таа популација ќе го прифати и доживеа фијаско во реализацијата.