Најгледаната Netflix серија отвори судски спор стар 28 години

Ново судско рочиште за Ерик и Лајл Менендес е закажано за 29 ноември, повеќе од 28 години откако тие беа осудени за убиство на нивните родители и две недели откако серијата по нивната приказна дебитираше на Netflix и стана хит број еден.

Окружниот обвинител на Лос Анџелес, Џорџ Гаскон, го објави ова на прес-конференција и рече дека се откриени нови докази дека браќата наводно биле малтретирани од нивниот татко Хосе Менендес.

„Беа дадени изјави. Добивме фотокопија од писмото што еден од браќата наводно го испратил до друг член на семејството во кое вели дека е жртва на злоупотреба“, рече Гаскон, „Имаме и докази обезбедени од одбраната, неговите адвокати, дека еден од членовите на бендот Menudo тврди дека Хосе Менендес го малтретирал“.

Новото рочиште на крајот би можело да доведе до повторно судење или повторно изрекување на казната за Ерик и Лајл, но Гаскон рече дека сè уште не е донесена одлука.

„Ниту една од овие информации не е потврдена. Во овој момент не сме подготвени да кажеме дали им веруваме или не на информациите, но тука сме да ви кажеме дека имаме морална и етичка обврска да го разгледаме она што ни е претставено, дали заслужуваат да бидат казнети - иако очигледно беа убијци - затоа што со години се во затвор и ги вратија долговите кон општеството. Ако имаше докази кои тогаш не беа презентирани пред судот и ако беа презентирани тие докази, можеби поротата ќе дојдеше до поинаков заклучок“, додаде тој.

Ерик и Лајл беа осудени на доживотен затвор во 1996 година за убиство на нивните татко и мајка, Хосе и Кити Менендес, во нивната вила во Беверли Хилс на 20 август 1989 година. На браќата првично им се судеше одделно, но тоа резултираше со поништено судење. Кога им се судеше заедно, тие беа осудени на доживотен затвор, во своја одбрана, браќата рекоа дека убиствата ги извршиле од страв за нивните животи, откако нивниот татко ги малтретирал и сексуално ги вознемирувал.

Потоа, во 1998 и 1999 година, Апелацискиот суд во Калифорнија и Врховниот суд на Калифорнија ги потврдија пресудите на Ерик и Лајл и одбија да го разгледаат случајот. Браќата исто така поднесоа петиција до Окружниот суд на Соединетите Американски Држави и Апелациониот суд на САД за деветтиот округ, но беа одбиени. Во мај 2023 година, Ерик и Лајл побараа ново сослушување откако се појавија докази дека нивниот татко наводно го малтретирал пејачот Рој Росело од порториканскиот бенд Menudo.

Серијата Monsters на Рајан Марфи ја истражуваше приказната на Ерик и Лајл и беше премиерно прикажана кон крајот на септември на Netflix. Серијата стана огромен хит и имаше 19,5 милиони прегледи во првата недела од објавувањето.

Исто така, предизвика контроверзии за начинот на кој беа прикажани браќата, особено прикажувајќи ја нивната врска како хомоеротична и инцестуозна на моменти. Од затворот, Ерик издаде соопштение во кое вели дека Марфи имал лоши намери и погрешно ги претставил, додека други членови на семејството Менендес ја опишас серијата како „гротескна“ и „исполнета со невистини“.

Сепак, нејзината популарност предизвика случајот повторно да се отвори, а милиони гледачи на серијата сметаат дека казната што ја добија е неправедно изречена.

Меѓу нив е и Ким Кардашијан, која во личен есеј за NBC News напиша дека се надева дека доживотната казна на браќата, кои веќе одлежаа 35 години затвор, може да биде ублажена.