Малата пацифичка држава Палау има најголем процент на луѓе во светот кои се вакцинирани против коронавирусот, објави денеска Меѓународната федерација на друштвата на Црвениот крст (МФЦК) и апелираше до нејзините соседи да го следат тој пример и да ги засилат напорите за имунизација.
Според МФЦК, 99% од населението во Палау над 12-годишна возраст ги примило двете дози на вакцината против коронавирус, повикувајќи се на владини податоци кои покажуваат дека станува збор за 16.152 лица.
Тоа го става Палау, архипелаг од 500 острови во западниот дел на Тихиот Океан, на „прво место“, наведува МФЦК.
Се додава дека Палау е пред земји како Португалија, која е прогласена за една од земјите со најголем број вакцинирани во светот, бидејќи 80% од населението од 10-те милиони луѓе е целосно имунизирано.
Но, исто така, овој извештај е остар контраст со другите мали нации во регионот кои го одложија воведувањето вакцинација поради ограничената понуда на вакцини и двоумењето на населението.
Итноста за зголемување на стапката на вакцинација во регионот е зголемена со претстојната сезона на циклони во пацифичкиот регион, што би можело да предизвика поголема штета на егзистенцијата која веќе е погодена од пандемијата, наведува МФЦК.
МФЦК додава дека државата Палау не е сама меѓу пацифичките држави што водат во светски рамки во однос на стапката на вакцинација по глава на жител.
Куковите Острови, кои имаат 17.000 жители, имаат 96% од населението кое е целосно вакцинирано, додека далеку поголемиот Фиџи, со 896.000 жители, има 96% од населението кое примило барем една доза, додава МФЦК.