Италијанецот Ламонт Марсел Џејкобс е победник на трката на 100 метри на ЛОИ во Токио.
Џејкобс во финалната трка мина за 9.80 секунди со што постави нов европски рекорд, четири стотинки подобро време од она кое претходно го трчаше во полуфиналето, а кое исто така беше европски рекорд.
Италијанецот им ја врати на Европејците титулата во оваа дисциплина по 29 години.
„Не знам, сето ова ми делува како сон. Се чувствувам фантастично. Мислам дека дури утре ќе сфатам што сум направил. Сега ми делува неверојатно“, изјави тој по сензационалната пoбеда.
Џејкобс во Токио не дојде со големи очекувања, но го искористи фактот дека во финалето не имаше некој фаворит. Обложувалниците му дадоа 3% шанси за победа, но и покрај сите прогнози, успеа да победи.
Џејкобс е роден во САД, во Ел Пасо. Татко му е Американец, а мајка му Италијанка. Поголем дел од животот минал токму во Италија. Израснал без татко, кој бил испратен на мисија во Јужна Кореја, па продолжил да живее во Далас. Целата грижа за него ја презела мајка му.
Сепак, родителите повторно стапиле во контакт, а самиот Џејкобс вели дека тоа имало позитивно влијание на неговиот живот. На 10-годишна возраст почнал да се занимава со атлетика.
Оженет е и тако на две деца со сопругата Никол, а има и дете од претходната врска. Иако е роден во Тексас, себеси се смета за вистински Италијанец, а многу малку се чувствува како Американец, призна и дека не го знае баш најдобро англискиот јазик.
Новиот олимписки шампион во елитната дисциплина, кој досега живееше во анонимност, освен што се занимава со атлетика, тој е член и на спортскиот оддел на италијанската полиција.
Претходно годинава стана европски првак на 60 метри, а пред две години на Светското првенство во Доха испадна во полуфиналето.
Вивиана Масини, мајката на 26-годишниот Марсел, со солзи и емоции изјави дека нејзиниот син нема да застане тука.
„Како дете му кажав дека ќе му се придружи на Усаин Болт на врвот и тоа и го направи. Следната цел е светски рекорд и ќе успее ако не оваа година, тогаш следната“, изјави самоуверено мајката на човекот кој стана најголемата сензација на Олимписките игри во Токио.
