Заврши 37. издание на Фестивалот на забавни мелодии Макфест, кое годинава немаше натпреварувачки карактер.
На ревијалната вечер синоќа се слушнаа вкупно 18 песни на сцената на Центарот за култура „Ацо Шопов“-Штип, каде што по две години поради пандемијата се врати во салата каде низ годините беа испеани безвременските хитови.
Организаторите решија дека публиката во текот на годината ќе одлучи која песна ќе биде најслушана, а на 38. издание на Макфест догодина да се додели парична награда. Општина Штип беше организатор на Фестивалот на забавни мелодии Макфест, заедно со спонозори и општествено одговорни компании. Водители на фестивалот беа Маријана Стојановска и Димитар Атанасовски, а на сцената како презентери се појавија и Лила Филиповска, Борко Ристовски и Миланка Рашиќ.
Публиката, пак, главно со став дека макфестовската сцена беше здодевна, а музичката енергија млака, особено првата вечер, додека на втората неколку познати имиња како Тамара Тодевска потсетија што е фестивал.
Сепак, останува прашањето дали некогаш ќе се повторат рефрените на најпознатите и најслушаните песни од македонската поп музика што биле испеани токму на сцената на Макфест – „Кога те нема“ на Хелена Благне (1986), „Осамен“ на Трајче Манев (1987), „Признавам“ на Маријана и Росана (1988)...
Да се потсетиме како звучеа вистинските хитови од 1986 до денес, низ годините, со надеж дека Макфест повторно ќе произведе безвременски хит.
