Најмалку 46 лица загинаа во сообраќајна несреќа на автопатот „Струма“ во Бугарија, кога се запалил автобус со македонски таблици што сообраќал на релација од Истанбул до Скопје.
Автобусот влегол во Бугарија од Турција преку ГП „Капитан Андреево“ нешто по 21 часот, а несреќата се случила околу 2 часот на автопатот „Струма“ на правецот Софија-Благоевград.
Како што изјави за бугарските медиуми началникот на Пожарникарската служба Николај Николов, во автобусот патувале 53 лица. Загинале 46, а останатите се пренесени во болница. Автобусот е опожарен, а на местото на несреќата сѐ уште се противпожарни екипи и медицински тимови.
Сообраќајот во двата правци на автопатот е во прекин.
Сочувство за загинатите изрази премиерот Зоран Заев, кој бил информиран за несреќата од бугарскиот премиер Стефан Јанев.
Техничка неисправност на автобусот или грешка на возачот, можни причини за несреќата
Грешка на возачот или ненадејна техничка неисправност на автобусот, се можни причини за несреќата, изјави директорот на бугарската националната истражна служба Борислав Сарафов.
Меѓу загинатите е и возачот на автобусот.
Бугарскиот министер за внатрешни работи Бојко Рашков, кој заедно за премиерот Стефан Јанев се на местото на автобската несреќа, изјави дека причината детално ќе се разјасни во текот на истрагата
– Сликата е ужасна и не секој може да ја поднесе. Никогаш не сум видел вакво нешто. Тешко е да се одреди колку луѓе има и кои се, рече Рашков.
Тој истакна дека покрај опожарениот автобус, сообраќале уште три. Настраданиот автобус се движел последен.
Заштитната ограда на автопатот е уништена од автобусот, а сосема е можно пожарот да настанал во контакт на автобусот со заштитната ограда, рече Рашков.
Градоначалникот на Перник Станислав Владимиров: На оваа делница често има несреќи, оваа рута е една од најтешките во Бугарија
Автобусот скинал околу 50 метри од заштитната ограда, изјави градоначалникот на Перник Станислав Владимиров пред новинарите во близина на местото на несреќата, во која загинаа 46 лица.
Како што јави дописникот на МИА од Софија, според Владимиров, делницата е влажна. Причините за несреќата можат да бидат многу.
„Патот е влажен. Овој дел има многу голема надолнина. Од вчера врне слаб дожд. Не може да се каже дали причината е лошото време, но причините може да бидат многу“, рече Владимиров.
Според градоначалникот на Перник, на овој дел од патот често се случуваат несреќи. Оваа рута е една од најтешките во Бугарија, има огромна денивелација, и голема концентрација на сообраќај.