Сана Марин е избрана за нов премиер на Финска и со 34 години е најмладата премиерка во светот.
Марин, која во почетокот на годинава беше назначена за министер за транспорт и комуникации, беше изгласана од нејзината Социјалдемократска партија по турбулентната политичка недела во која премиерот Анти Рине даде оставка поради критиките упатени од редовите на неговата коалициска влада за начинот на кој се справи со штрајкот на поштенските работници.
Марин сега ќе ја води централно-левичарската коалиција составена од уште четири други партии кои исто така ги водат жени и сите имаат помалку од 35 години.
„Не падна од небо“, вели Јохана Кантола, професорка по родови студии на универзитетот Тампере. „И јавноста многу ја сака.“
Кога даде свечена заклетва во вторникот, Марин стана најмлад премиер на функција во светот. Премиерката на Нов Зеланд, Џасинда Ардерн, има 39 години, а украинскиот премиер Олексиј Хончарук има 35.
Она што дополнително ја истакнува Марин е фактот дека била израсната од геј родители: мајка ѝ и нејзината партнерка.
Во интервју за финскиот вебсајт Menaiset во 2015 година таа изјави дека како дете се чувствувала дека е „невидлива“ бидејќи не можела отворено да зборува за нејзината семејна ситуација во училиште.
„Тоа беше нешто за кое не се зборуваше“, рече таа, објаснувајќи дека отвореноста за ЛГБТК+ семејствата во Финска е нешто што се случува од неодамна.
„Тишината беше најтешка. Невидливоста правеше да се чувствувам инфериорно. Не бевме признаени како вистинско семејство, ниту пак бевме еднакви со другите“, објаснува таа.
„Дури и кога бев малечка, бев многу директна и тврдоглава. Ништо не поднесував со леснотија.“
Марин нагласува дека мајка ѝ секогаш ја поддржувала и ѝ помогнала да верува дека може да направи сѐ што ќе посака.
Тоа што израснала во работничко семејство со две геј жени ѝ помогнало да сознае колку е важно да се бори за социјална правда.
„За мене, сите луѓе секогаш биле еднакви. Тоа не е прашање на лично мислење. Тоа е основата на сѐ“, децидна е Марин.
Марин е мајка на 22-месечната Ема Амалија Марин и преку социјалните мрежи отворено зборуваше за нејзината бременост и предизвиците на мајка која активно работи. Објавуваше фотографии од текот на бременоста, како ја дои ќерката и како се справува со улогата на мајка, вршејќи силно влијание на жените кои поминуваат низ истото.
