Фудбалерот на Баерн, Лукас Ернандес, до 19 октомври мора да го реши проблемот со судот во Мадрид, кој нареди поранешниот играч на Атлетико да одбере затвор за издржување на затворската казна.
Ернандез доби повик доброволно да ја отслужи затворската казна, откако беше осуден во декември 2019 година за прекршување на забраната за приближување кон својата партнерка Амелија Оса Љоренте.
Позадината на оваа приказна е потполно бизарна и неверојатна. Имено, на Лукас и Амелија не им беше дозволено да се гледаат шест месеци откако Французинот беше прогласен за виновен за семејно насилство по една расправија во 2017 година.
И двајцата беа казнети со општокорисна работа, а не им беше дозволено да се приближуваат еден до друг на помалку од 500 метри.
Меѓутоа, во јуни истата година, четири месеци по изрекувањето на казните и забраните, младиот француски фудбалер и Амелија Оса Љоренте се венчаа во Лас Вегас и отпатуваа на меден месец на Бахамите.
Кога се вратија во Мадрид, беа задржани на аеродром, а Лукас ноќта ја помина во притвор. Обвинителството потоа побара да биде осуден на една година затвор за прекршување на мерката забрана за доближување.
Адвокатите на Лукас побараа казната да се замени со општокорисна работа, но жалбата беше одбиена бидејќи Лукас веќе ја прекршил првобитно изречената казна.
Сега на Ернандес му е наредено да ја отслужи затворската казна, не поради расправија со неговата сегашна сопруга, туку затоа што не ја изврши судската наредба. Одбраната на Лукас поднесе жалба и Покраинскиот суд во Мадрид ќе ја разгледа на 19 октомври.
Иако веројатно нема да мора да оди во затвор, приказната се развлече години откако започна и Ернандес никогаш не успеа да се справи со последиците од неговите постапки.
Да потсетиме, Ернандес пристигна во Баерн во 2019 година кога германскиот клуб ја плати откупната клаузула на мадридски Атлетико, која изнесуваше 85 милиони евра, што го направи најскапото засилување на баварскиот клуб на сите времиња.